(កណ្ដាល)៖ យ៉ាងហោចណាស់អ្នកស្រុកកៀនស្វាយ ចំនួន២០នាក់ទៀតត្រូវបានធ្វើតេស្តរកឃើញថាមានវិជ្ជមានជំងឺកូវីដ១៩ និងមានការពាក់ព័ន្ធដោយផ្ទាល់នឹងអាជីវករផ្សារដើមគរ ផ្សារនាគមាស និងអ្នកប្រមូលបន្លែបោះដុំតាមស្រុក  ស្របពេលដែលមនុស្សជាប់ពាក់ព័ន្ធដោយប្រយោលជាង៥០០នាក់ផ្សេងទៀតត្រូវបានដាក់ឲ្យធ្វើចត្តាឡីស័ករួចរាល់ហើយនៅ មណ្ឌលចំនួន៤នៃភូមិសាស្ត្រស្រុកកៀនស្វាយ និងបន្តយកសំណាក។ នេះបើតាមការឱ្យដឹងពីមន្ត្រីសុខាភិបាលខេត្តកណ្ដាលនៅយប់នេះថ្ងៃទី២៣ ខែមេសា ឆ្នាំ២០២១នេះ ។

ស្រុកកៀនស្វាយ បានរកឃើញអ្នកមានវីរុសកូវីដ-១៩ សរុបទាំងអស់ចំនួន ៥៦នាក់ហើយ ខណៈពេលដែលថ្ងៃនេះក្រុមការងារអនុគណៈកម្មការប្រយុទ្ធប្រឆាំងនឹងជំងឺឆ្លងកូវីដ១៩ ស្រុកកៀនស្វាយ ដឹកនាំដោយលោក អ៊ូ ឈាង អភិបាលស្រុក បានរកឃើញមុខសញ្ញាជំងឺកូវីដ១៩ថ្មី សរុបចំនួន ២០នាក់បន្ថែមទៀត នេះបើគិតត្រឹម យប់ថ្ងៃទី២៣ ខែមេសា ឆ្នាំ២០២១។

មនុស្សដែលរកឃើញមានវិជ្ជមានកូវីដ-១៩ ទាំង២០នាក់ថ្មីខាងលើនោះ ត្រូវបានយកទៅព្យាបាលនៅក្រុងតាខ្មៅ។

គួរបញ្ជាក់ដែរថា ផ្សារនានាក្នុងស្រុកកៀនស្វាយ ខេត្តកណ្តាលត្រូវបានលោកអភិបាលស្រុកចាត់ចែងក្រុមការងាររឹតបន្តឹងលើវិធានការកាន់តែម៉ត់ចត់ជាងមុនផងដែរ ស្របពេលដែលអភិបាលខេត្តកណ្ដាលបានចុះណែនាំ និងជំរុញដល់អាជ្ញាធរស្រុកកៀនស្វាយបន្តអនុវត្តន៍វិធានការណ៍ការពារជំងឺកូវីដ-១៩ឱ្យមានប្រសិទ្ធភាព៕